العمر الافتراضي بحسب وجهة نظرك أو تجربتك

على حسب استخدامك 

 مالها عمر افتراضي

فيه سيارات من عام 1969 والى الان لم يتم عمل شي بالقير او المكينة

انا عن نفسي ماشيك غير على الزيت والما وامشي شي غيره ماصلحه 
للين ماتوقف السيارة (:

الأديتر وطرمبه المويه تعتمد إعتماد على مويه الأديتر 

لو هي اصليه مع ماء مقطر صدقني بتطول معك 

القير والدفرنس والمكينه علي حسب استخدمتك 

معي كرسيدا مديل 92 قير ودفرنس بلادها 

بسبب المحافظه على الزيوت 

التاجر الكبير؟
يعني انت تغير زيت الدفرنس؟

حسب تجربتي وليس وجهة نظر 
فورد 2005 ،360 ألف كيلو

١- طرمبة الزيت ماقيد غيرتها 
٢- طرمبة الماء 250 ألف كيلو 
٣-الجنزير ماقيد غيرته 
٤-الرديتر فيه تهريب بسيط 
٥-القير وضبته قريب 350 ألف نتيجة اهمال الزيت
٦-الدفرنس شد بلده ماشاء الله

مالها عمر افتراضي على حسب الاستعمال والاستخدام 

كل قطعه في السيارة لها عمر محدد سواء كان استخدام راعي السيارة جائر او عادي

كل الي ذكرت قطع استهلاكية لها عمر محدد تتغير فيه 
الرديتر ما يتغير الا اذا فيه تنسيم او شق

طبعا مع التنظيف والغسيل كل 50 الف كيلو ان شاء الله ما تغيره طول ما السيارة ماشية معك < هذي اسويها انا من عرفت السيارات 

بالنسبة للجنزير بعض السيارات يتغير كل 100 ألف 
الناتيفا الميتسوبيشي كان يتغير بعد 150 الف 
والابيكا كذلك 

اما زيت الدفرنس انا ماقد غيرته 
اشيك عليه تشييك فقط اذا نقص زدته 

مع اني ما اشوف فيه ضرر لو غيرته بس ما قد غيرته

إلى يسئل على تغيير زيت الدفرنس 

نعم اغيره 
السيارات القديمه مافيها تقنيه اشان تخاف تخرب 

بالعكس لو غيرته بتتحسن معك إلسياره بشكل كبير 

أغلب السيارات جنزير حديد وهذا غالباً ما يتغير ، وأنواع أخرى مثل سيارات الميتسوبيشي تجي سير تيمن مطاط وهذا يتغير أقل شيء بعد 50 ألف كيلو ، والله أعلم .

الشغلات اللي انت ذكرتها ليست قطع استهلاكية لتحديد عمرها الافتراضي

يعني الرديتر وطرمبة الموية مستحيل انك بتروح تغيرها وهي سليمة مافيها شي ودورة التبريد فعالة وممتازة ، اصلن لو بتغيرها بيقولون عنك مهبول ( فلذلك ما تتغير الا اذا حصل فيها خلل بمعنى طرمبة الموية حصل فيها تهريب او شي وممكن تهرب في يوم وممكن بعد 10 سنوات ف صعب انك تحصر لها عمر افتراضي وايضا الرديتر كذلك فيه سيارات موديلها قديم شوي ورديترتها شد بلد واصحابها محافظين على تغيير موية الرديتر ويحط مويه اصلية ولذلك الرديتر يكون سليم وفعال 100%


الجنزير طبعا يختلف من سيارة لسيارة فيه بعض السيارات يجي ربل وهاذا من المفترض تغييره كل 150 الف تقريبا تزيد او تنقص شي بسيط على حسب السيارة وعلى حسب نوعيتها اما اللي تجي حديد الجنزير ما اشوف يحتاج له تغيير الا لاقدر الله مع التوضيب ، او اذا بدت فيه مشاكل اصوات او شي

طرمبة الزيت ايضا مالها عمر افتراضي لكن اشوف من الاسباب اللي تعجل في انتهى عمرها هو اهمال زيت المكينة حتى يشحم وبذلك يسدد الشخال ويضعف اداء الطرمبة وايضا السيفون المضروب والتجاري هاذا من الاسباب وبالنسبة للقير اشوف انه يتغير كل ممشى معين اقصد الزيت طبعا وواضب على تغييره ولا تكرش له واجد وتجهد القير وبيعيش معك سنين بدون مشاكل

آخر شي زيت الدفرنس بصراحة ما امتلكت سيارة موديل حديث دفع خلفي كل مواترنا الدفع الخلفي قديمة يوكون 2001 وكابرس 85 ولا قد غيرت لها زيت دفرنس وماشيه معي ولله الحمد

لكن الجديدة من اليوكون والتاهو اعتقد تحتاج الى تغيير ومتابعة لتفادي المشاكل

هاذا ردي على استفسارك